من رائعة عبدالرحمن الأبنودى (يامنة)
إوعى تصدقها الدنيا
غش ف غش
إذا جاك الموت يا ولدى
موت على طول
اللي اتخطفوا فضلوا أحباب
صاحيين في القلب
كإن ماحدش غاب
واللي ماتوا حتة حتة
ونشفوا وهم حيين
حتى سلامو عليكم مش بتعدي
من بره الأعتاب
أول مايجيك الموت، افتح
أول ماينادي عليك، إجلح
إنت الكسبان
إوعى تحسبها حساب
بلا واد، بلا بت
ده زمن يوم مايصدق
كداب
سيبها لهم بالحال والمال وإنفد
إوعى تبص وراك
الورث تراب
وحيطان الأيام طين
وعيالك بيك مش بيك عايشين
يوه يا زمان
مشوار طولان
واللي يطوِّله يوم عن يومه يا حبيبي
حمار